Abasaga ibihumbi 54 babana na virusi itera SIDA muri Kigali

Sangiza abandi

Umujyi wa Kigali nk’utuwe cyane mu gihugu, ni ho hagarara umubare munini w’abanduye Virusi itera SIDA kuko habarurwa 54746 bangana na 4.3% by’ahatuye

Ibi byagarutsweho mu bikorwa bigamije ubukangurambaga bwo kurwanya SIDA bwabereye mu Karere ka Nyarugenge, kuri uyu wa Gatanu tariki ya 10 Ukuboza 2021.

Umunyamabanga Nshingwabikorwa wungirije w’Akarere ka Nyarugenge , Nshutiraguma Esperance, yagaragaje ko kuba Umujyi wa Kigali ugifite abantu benshi barwaye Virusi itera Sida, bigaragaza ko hakenewe imbaraga nyinshi mu kuyihashya burundu.

Yavuze ko impamvu zihishe inyuma y’umubare munini w’abafite virusi itera SIDA muri Kigali biterwa no kuba ari umujyi uhurirwamo n’abaturutse imihanda yose bajya gushaka ubuzima, urubyiruko rwinshi n’abandi.

Yagaragaje ko hari intego yo gukora ibishoboka byose kugira ngo nibura hagabanywe imibare y’abandura ndetse n’abamaze kumenya aho bahagaze bafate imiti igabanya ubukana nk’uko bikwiriye.

Kugeza ubu mu Rwanda habarurwa abanduye Virusi itera SIDA bagera kuri ku bihumbi 220 bangana na 3% mu gihe muri Afurika yose habarurwa abagera kuri miliyoni 23, 8.

Umuyobozi Ushinzwe Ubuvuzi bwa Hepatite n’indwara zandurira mu mibonano Mpuzabitsina muri RBC, Dr Serumondo Janvier, yagaragaje ko hakenewe ubufatanye bwari wese mu guhangana n’ubwandu bushya bwa Virusi itera SIDA.

Ati “Turashishikariza abantu batazi uko bahagaze kwipimisha virusi itera SIDA, gufata ingamba zo kuyirinda no gufata neza imiti ku bamaze kuyandura kugira ngo twese hamwe tugire ubuzima bwiza. Tugomba gukomeza gutekereza ku ngamba nshya zo kurandura burundu virusi itera SIDA.”

Yavuze ko hari gahunda yo kugabanya ingendo zikorwa n’abafite virusi itera SIDA bagahabwa imiti y’amezi atatu no kubonana na muganga nyuma y’amezi atandatu aho kuba buri kwezi.

Umuyobozi w’Urugaga Nyarwanda rw’Abafite Virusi itera Sida (RRP+) Muneza Sylvie, yavuze ko bishimira intambwe yatewe mu rwego rwo kubafasha kuko mu bihe byashize baburaga gikurikirana.

Ati “Hari abantu twabaga muri kane twaraheze mu buriri, igihe kiragera Leta y’u Rwanda idukorera ubuvugizi mu kubona imiti. No kuba tuyibonera ubuntu ni andi mahirwe akomeye kuko ntitwari kubona ibyo twishyura. Kugeza uyu munsi turi gushima Nyakubahwa Perezida wa Repubulika aho yatuvanye n’aho atugejeje”

Urubyiruko rugarukwaho mu kudafata imiti igabanya ubukana bwa virusi itera SIDA. Uyu muyobozi yavuze ko bafite gahunda y’ubukangurambaga mu rubyiruko hagamijwe gukomeza kurwegera cyane ko hanashyizweho inzego ziruhagarariye mu Turere twose tw’igihugu

U Rwanda rufite intego ko bizagera muri 2030 nta bwandu bushya bwa Virusi itera SIDA bukihagaragara.

Ubuyobozi bw’umujyi wa Kigali bugaragaza ko hakenewe ingamba zihariye mu kurandura burundu ubwandu bushya bwa virusi itera SIDA

Leave a Reply

Your email address will not be published. Required fields are marked *